رؤيةرمضان 2016

عبدالله غلوش يكتب: غلوشيات رمضانية 15

– ميريهان حسين طالعة بدور ريهام سعيد في ” الخانكة” ولبني عسل في “المغني”.

– هبة رجل الغراب .. أدمن الصفحة الرسمية للمسلسل علي الفيس بوك من كتر ما هو مش لاقي حاجة حلوة في المسلسل يشتغل عليها ، بدأ من أمبارح يعمل شير لحلقات مسلسل “بنات سوبر مان”.

– بعد أنتقال ايمان الحصري لقناة DMC ، مبقاش فاضل غير حسن راتب اللي لسه محتفظ بمكانه في قناة المحور حتي الآن.

– جراند أوتيل .. لما تشوف عمرو يوسف وهو بيقول لأمينة خليل “انا يمكن مكونش الشاطر حسن بس أنتي ست الحسن والجمال” ، وفي الفاصل تسمع الطفل بتاع جهينة وهو بيقول للبنت اللي معاه في الإعلان “فكهاني وبحب المانجة” ، هاتعرف ثورة 52 عملت أيه في البلد دي.

– أستقالة وزير الداخلية “راس الغول” .. وفاة صلاح عبدالله “الخروج” .. وفاة سميرة عبدالعزيز “الخانكة”.. أنتحار الممثل محمود حجازي “ونوس” ، فشل محاولة أنتحار غادة عبدالرازق “الخانكة” .. ملخص أهم عناوين الصحافة اليوم.

– أزمة نسب .. بقينا في 2016 ولسه لما حد يضرب حد في مشهد خناقة بيقول (هووه).

– بعد شهر كامل مش بتذيع فيه غير مباراة الأهلي والمعادن موسم 2004 ، بريزنتيشن أغلقت قناة الأهلي تمهيدا لإعادة أطلاقها في مباراة الأهلي والزمالك ثالث أيام العيد.

– كلمة سر .. لعنة الشيخ الشعراوي تطارد حسن يوسف حتي الآن.

– كلمة سر .. لما حلقة النهارده كلها تدور حوالين أن مديرة المدرسة اللي لطيفة شغالة فيها أختارتها عشان تبقي المشرفة علي رحلة عاملينها للعين السخنة ، والحلقة خلصت قبل ما لطيفة تاخد قرار نهائي في الموضوع ده .. تخيل بقي باقي حلقات المسلسل عاملة أزاي؟

– الشيف شربيني اهدي مفيدة شيحة طاسة تيفال بمناسبة عيد الأب.

– هي ودافنشي .. خالد الصاوي محتاج يسأل ليلي علوي عن أسم دكتور الدايت بتاعها.

– الظهور الأول لصفاء الطوخي في فوق مستوي الشبهات ، والظهور الأول لدلال عبدالعزيز في نيللي وشريهان.

– أفراح القبة بدون سوسن بدر وبناتها لا يمثلني.

– أفراح القبة .. حلقة كاملة مافيهاش اي معلومة مفيدة غير أن هاني أبن أم هاني “سلوي عثمان” مات غرقان.

– وعد .. لو أختارتي اللحمة ماينفعش عينك تبقي في الفراخ ، عشان وقتها لا هاتستطعمي اللحمة ولا الفراخ .. هند رضا بتنصح مي عزالدين تختار بين جوزها “حازم سمير” وعشيقها “أحمد السعدني”.

– واضح أن بيبسي أكتفت بالإعلان علي مبارايات اليورو ، وهاتقلد كوكاكولا في تخصيص ميزانية إعلانات رمضان لصالح الأعمال الخيرية.

– أبو البنات .. عشان نكون منصفين ، مصطفي شعبان لابس شوية بنطلونات بيجامات حلوة في المسلسل ده.

– سقوط حر .. مسقعة باللحمة المفرومة ، مكرونة باشميل ، محشي ، كريم كراميل .. صفاء الطوخي تضرب من جديد.

– الخروج .. دموع درة في حلقة أمبارح ، خلتني لأول مرة أضحك علي مشهد واحدة بتعيط ، من أيام مشهد بشري الشهير في “العشق والهوى” بتاع بابي خاين بابي كداب.

– عبور لاند .. هو المخرج مجبش سيد معوض يعمل الإعلان ليه مكان أحمد فتحي ، طالما أن الاسكربت عبارة عن مجموعة مشاهد ثقيلة الدم بين واحد أسمه سيد وواحد أسمه حسن.

– والنبي يارب تعترني في واحد يطلب مني أقتل واحد ويديني مليون دولار .. دعاء أحد الشباب علي إحدي مقاهي وسط البلد بعد مشاهدة حلقة الأمس من “الاسطورة”.

– في علاقة وثيقة بين الدهب و قلوب البنات .. قرب اي حتة دهب من اي بنت و حط أيدك على قلبها هتلاقيه بيدق .. يحيي الفخراني “ونوس”.

– الحريم جيوب غويطة محدش يعرف جواها فلوس ولا عقارب .. فتوح أحمد ” يونس ولد فضة”.

– مفيش حد في البلد دي بياخد حقه بالقانون .. بيومي فؤاد “الميزان”.

– ربنا يرحمك يا أمي ويرحم أمهاتنا جميعا ويخلي أمهاتكم يارب.

نرشح لك

عبدالله غلوش يكتب: غلوشيات رمضانية 14

شارك واختار .. ما هو المسلسل الكوميدي الذي تتابعه في رمضان؟ أضغط هنـــا

بنر الابلكيشن

الوسوم
إغلاق
إغلاق